＜關燈‧賞月＞

向問天

＜關燈‧賞月＞活動講稿

關燈賞月                                                                        楊光宇

8月17日，出席嘉道理農場及大埔環保會＜關燈‧賞月＞活動講稿  (全長兩分鐘)

邱博士、王署長、各位來賓、各位市民，

仲有唔夠一個月，就係人月兩圓的中秋佳節，令我想到中國古語「月明星稀」這句話。月光照到個天咁光，就自然會唔見左好多較暗的星星！咁大家可能以為我哋呢班喜歡睇星的人會唔喜歡個月光？事實上又唔係播。月球係一個好靚、又容易觀測的天體，上面有好靚嘅環形山、隕石坑，我哋成日都可以用望遠鏡望到；另外，月球有時又可以引起好罕有嘅天文現象，例如，８月１日在新疆可以睇到非常壯觀的日全食；又例如，今早凌晨３點到６點又有月偏食睇。喜歡睇星嘅人唔怕月光，只係驚有光害！

講起又有點奇，光係現代文明的象徵，又點會有害？中國人的成語講得好─────正所謂「過尤不及」，簡單地講，所謂光害，就係太強的光，又或者係太多無謂的光，照係唔應該照的地方，又或者係在不適當的時間照明。燈光照明, 依照常理, 應該照在地面人類活動的地方; 但不知何故, 卻有人喜歡無啦啦將啲光照上個天嗰度!最佳的例子，莫過於大家左手邊的國金二期，每晚屋頂有枝大電筒照上個天嗰度，我真係怕長期冇管制咁容許照光個天，長此下去，我哋嘅子女，真係會變成「看不見星星的下一代」。

香港嘅光害有幾嚴重？做過一個小試驗，在萬里無雲，加上最好的環境下，星光大道的夜空，仍然比外國光一百倍；在有污染和薄雲的最壞日子，可以光上一千倍！不久前，有環保團體舉行左一個為期一小時的維港熄燈活動，估吾到單單係熄左大約一百幢商厦上面的廣告牌同裝飾照明，已經在現場測到星空暗了0.3個星等，而遊客不但即時見到更多星星，亦唔覺熄燈有損香港東方之珠嘅美譽！

作為天文人，我哋當然想下一代仍然有星睇，而作為一個社會上的公民，我哋更擔心由過度照明所引起的過量二氧化碳排放，會加劇全球暖化。好樂意見到〈關燈‧賞月〉呢類有意義的活動，希望大家坐言起行，響應〈噸噸愛地球〉，達成每人每年減排一噸二氧化碳的目標，亦讓我哋同我哋的下一代，有機會欣賞繁星滿天的夜空，多謝大家。

[ 本帖最後由 向問天 於 2008-8-20 22:32 編輯 ]